Ég mun ekki blogga meira hér á þessari slóð ......

Kæru vinir sem hafið verið að fylgjast með blogginu mínu. Takk fyrir áhugann og athugasemdirnar. Ykkar vegna held ég blogginu áfram en flyt mig yfir á heldur skemmtilegra bloggsvæði. Bæði auðveldara fyrir mig að vinna á því svæði og svo held ég að það sé skemmtilegra fyrir ykkur. Aðeins meira fansí og flott. Slóðin á nýja bloggið er:
http://ingolfursig.wordpress.com/

Þetta bloggsvæði verður opið eitthvað áfram en ég mun hins vegar ekki halda því við. Fljótlega verður því svo lokað.
Með bestu jóla- og bloggkveðjum
Ingólfur

Þær eiga afmæl´í dag, þær eiga afmæl´í dag.

Þær eiga afmæl´í dag, þær eiga afmæli afmæl´í dag. Þær eiga afmæli frænkur, þær eiga afmæl´í dag. Báðar þessar yndislegu krúsídúllur okkar, Aldís Agla Sigurðar- og Guðfinnudóttir (stóra stelpa er 5 ára) og Kamilla Sif Carls- og Laufeyjardóttir ( er ársgömul).

Fór á Landsann og sótti vottorðið frá Friðbirni um að ég sé óvinnufær um ótilgreindan tíma. Þarf að skila því á skrifstofuna í MK þannig að það virki frá 1. des.

Veikindarétturinnn minn virkar sem sagt þannig að ég á, eftir 12 ára starf 9 mánuði í veikindarétt. Ég er ekki alveg með á hreinu hvað ég er búinn að nota mikið af réttinum, þarf að tala við Sigríði skrifstofustjóra um það. Notaði líklega restina af október og allan nóv og des. Skoða þetta betur með Sigr. Hún er pottþétt með þetta á hreinu. auðvitað á ég að vera með þetta á tæru, búinn að vera trúnaðarmaður í nokkur ár og í samstarfsnefnd líka. En svona er þetta, þegar kemur að réttindafrumskóginum þá er maður fljótur að villast. Fór í Elkó og verslaði "gullskarttengin" fyrir Guðna. Keypti líka 2 Gb minniskort í símann minn og ryksugupoka í nýju ryksuguna. Brynja reddaði þessu með mjög fínum afslætti. Nú er bara að vona að hljóðið í sjónvarpinu hætti því þrátt fyrir afslátt kostuðu þessi 2 skarttengi ca 7 þúsund kall.
Fór í MK, nennti samt ekki í útskriftina í Digraneskirkju, ákvað að vera bara í deildinni og baka eins og vitlaus væri. Lagaði deig í lagterturnar hennar Laugu, bæði ljósa og dökka. Lagði svo ávexti í romm fyrir Stollen. Kannski get ég haldið eitthvað áfram með þetta á morgun en reikna samt með að gera a.m.k. Stollen á mánudaginn með ÁÞT. Settist að sjálfsögðu inn í sal og fékk mér snittur, kaffi og rjómatertu sem hefðbundið er að bjóða upp á eftir útskrift. Hitti auðvitað fullt af fólki þar eins og nærri má geta, t.d. Guðjón gamla húsvörð sem er alltaf gaman að hitta. Hann er nú aðeins farinn að láta á sjá karlinn enda kominn á sjötugsaldurinn. Kvartaði um að líklega þyrfti að fara að skipta um mjaðmakúlu hjá sér. Alltaf verið þægilegur að tala við og einn af þessum kynlegu kvistum sem skreyta í kringum sig þótt ekki sé hann óumdeildur frekar en sumir aðrir sem teljast meiri spámenn. Þegar ég keyrði heim frá MK um kl. 17 skal ég játa að ég var farinn að lýjast. Kom við heima og skipti um föt. Við Laufey Sif og Kamilla Sif fórum saman í afmælisveisluna hjá Aldísi Öglu en Birna ætlaði að koma beint úr vinnu þangað. Bjarni Grétar og Beta ætla að koma þangað aðeins seinna. Fínasta boð þar, pylsupartí + kökur og tertur. Ég bætti að sjálfsögðu á mig þarna þrátt fyrir að ég vissi af matnum hjá Atla og Brynju eftir smá stund (merkilegt hvað meður getur borðað þessa dagana;). Tók 2 rjúpur hjá Ella á leiðinni úr afmælinu (gjafarjúpur frá Ásgeiri hennar Rögnu). Hengdi þær upp á svalir við hliðina á frænkum þeirra sem þegar hanga á svölunum (nú eru þær 12).

Fórum í langþráð get togather hjá Atla og Brynju eftir afmælisveisluna hjá Aldísi Öglu. Löbbuðum yfir í Viðarrimann í frábæru jólaveðri. Ætluðum varla að nenna inn til Gestgjafanna en létum okkur hafa það fyrir rest;-) Vorum búin að ákveða, til að minnka fyrirhöfnina, að borða Tikka masala frá Austurlandahraðlestinni í Spönginni. Mjög góður matur, Atli var búinn að kaupa flösku af Gammel Dansk (sem betur fer) tókum 3 G að sjálfsögðu, nema Brynja er löglega afsökuð í þessu máli. Slógum á þráðinn til Svíþjóðar og töluðum pottþétt í klukkutíma við HF og Anders, tókum síðasta G í beinni og sungum fyrir Anders að sjálfsögðu. Við Atli ræddum mikið um súkkulaði og tengda hluti og er ýmislegt á prjónunum þar sem ekki er tímabært að ræða núna. Á örugglega eftir að koma því hérna að síðar. Við röltum heim um kl 12 í ekki síðra veðri en við komum í. Vorum leyst út með þannig gjöfum að það tók verulega í að halda á pokanum heim. Það segir nú kannski ýmislegt um mig og mitt úthald þessa dagana að ég þurfti að fá Birnu til að halda á pokanum seinni hluta leiðarinnar. Þegar við komum heim fór ég út með Vask í stuttan göngutúr. Kamilla Sif og Laufey komu og heilsuðu upp á okkur. Gjöfin frá okkur og Helgu (mömmu Kalla og systrum) var á gólfinu þegar við komum. Haukur, kærasti Helgu, hafði séð um að kaupa gjöfina, Britax barnabílstól upp að 11 ára. Haukur er í góðum tengslum við Sjóvá gegnum fyrirtæki sitt

Bænir í stað jólakorta í ár.

Þetta er að komast í vana á morgnana að byrja á að taka til í hafragrautinn, hendast svo út í jólasnjóinn með Vask kl. 7, taka einn labbhring, keyra út í bakarí ef þörf er á (Bakarameistarann við Húsgagnahöllina) kaupa eitthvað gott brauð og (algjör skylda) 2 - 3 múslístangir nammi. Síðan taka góðan tíma í að sópa snjóinn af ÖLLUM bílunum okkar og svo er bara að drífa sig inn að borða morgunmatinn og lesa blöðin með spúsunni sem yfirleitt er komin niður og búin að gera sig sæta þegar þarna er komið sögu. Morgunmaturinn í kyrrðinni er enn sem fyrr mín uppáhaldsmáltíð

Átti tíma hjá Friðbirni kl. 11:20 ætlaði að vera mættur í blóðprufu klukkutíma fyrr. En steinsofnaði (að skipun Laufeyjar) kl. 9:30 og vaknaði ekki fyrr en kl 11. Brunaði niður á Landsa og hringdi í Birnu á leiðinni. Hún ætlaði að koma með mér að hitta Friðbjörn. Hittum hann á réttum tíma og áttum mjög góðan fund með honum. Við ákváðum í samráði að taka okkur 2 vikna frí frá öllum lyfjagjöfum og hittast aftur ca viku af janúar. Ræddum óvenju mikið um horfur og slíkt og það var mjög gott. Ekki eins og það sé mikið hægt að spá í þessa sérstöku kristalskúlu en samt gott að fara öðru hverju í gegnum hlutina hreinskilinslega. Ég fékk síðan tíma aftur 8. janúar kl. 12 og geri þá ráð fyrir að fara í lyfjagjöf. Fór í blóðprufuna að þessu loknu og sé bara til hvort Friðbjörn hringir niðurstöðurnar til mín eða hvort ég sé þær þegar ég hitti hann í janúar. Fór í OG Vodafón og fékk nýjan afruglara eins og Guðni í Elkó var búinn að biðja mig um að gera. Kom reyndar í ljós þegar strákarnir (Kalli og Bjarni) voru búnir að tengja hann rétt þá er sama hljóðið í sjónvarpinu;-( Á morgun ætla ég í Elkó og kaupa gullskarttengisnúrur. Ef það virkar ekki þá tala ég aftur við Guðna með tveimur hrútshornum. Bjarni kláraði að "setja gestasalernið saman aftur eftir málunina" og þetta kemur reglulega vel út hjá honum. Efnilegur málari á ferðinni þar. Fór upp í MK og hitti loksins á Margréti, búinn að reyna lengi að ná tali af henni. Hún var mjög jákvæð enda má segja að allt hafi gengið eins og best gat orðið miðað við aðstæður. Ásgeir Þór og Ásthildur hafa í sameiningu leyst öll kennslumálin ótrúlega vel og ég held að allir þræðir séu vel hnýttir. Ég fékk sms frá Kristínu hans Flosa á Flugustöðum og ákvað að hringja í hana frekar heldur en far að svara sms-inu. Þegar Kristín svaraði kom í ljós að þau voru á leið á Djúpavog í matarboð til Stefu og Ninna. Stefa er dóttir Sigga Albertssonar heitins frænda míns (hálfbróðirs ömmu Stefaníu). Það var gaman að spjalla við Kristínu og allt gott að frétta úr sveitinni. Við Birna fórum í bæinn kl 19, lögðum fyrir framan Kjörgarð og löbbuðum niður Laugarveginn. Fórum inn í búð sem heitir Moods of Norway. Ég sá gegnum gluggann að Henry Reynisson bakari stóð við afgreiðsluborðið enda kom í ljós að hann rekur þessa búð ásamt vinum sínum. Ferlega flott búð með flottum vönduðum vörum framleiddum í skandinavíu. Eða eins og stóð innan í einum jakkafötunum sem kostuðu reyndar 90 þúsund kall "Made in scandinavian by some serius hot girls". Löbbuðum áfram niður eftir (vorum farin að svengjast) og fórum inn á veitingastað þar sem áður var "Leggur og skel" en heitir nú - ja skritið en satt - Scandinavian smörrebröd;-) Fengum okkur H.C Andersen brauðsneið, camenbert og bacon brauðsneið og raupssprettusnittu. Þessu skoluðum við að sjálfsögðu niður með bjór og Gammel Dansk. Skemmst er frá því að segja að þetta bragðaðist allt saman afbragðs vel og fórum við södd og sæl út í jólaskæðadrífuna sem nú var boðið upp á á Laugarveginum. Gengum inn í Dómkirkjuna en Anna Sigríður hafði sagt okkur frá því að alla fimmtudaga milli 20 - 22 er þar bænastund. Komum við í 10 -11 fyrst til að kaupa Ópal í munnin. Held að Birna hafi ekki viljað anga af Gammel í Dómkirkjunni. Það var ofsalega notalegt að sitja þarna, kveikja á kertum og láta hugann reika. Löbbuðum svo bara aftur upp eftir komum við í Nýlenduvöruverslun Hemma og Valda (Valdi er bróðir Rakelar svilkonu) þar sem ég fékk mér bolla af kakói með rjóma. Það hefði nú bæði mátt vera bragðmeira og heitara enda viðurkenndi "kaupfélagsstjórinn" að hann hefði gleymt mér "aðeins" eins og hann orðaði það. Við hittum Regínu vinkonu Laufeyjar þarna inni og svo droppaði sjálf Lay-Low inn á meðan við vorum þar, greinilega heitur staður. Þegar heim var komaið var Laufey Sif búin að baka stóran skammt af skinkuhornum fyrir afmæli Kamillu Sifjar sem halda á upp á á sunnudaginn. Mér skilst á LSI að það eigi að bjóða milli 80 og 90 manns.... bilun.

.

þarf að fara á Landsann og sækja vttorðið frá Friðbirni.

Kaupa gullskarttengisnúrur í Elkó

Mamma ætlar að koma á morgun í tiltekt

Frúin hlær í betri bíl - frá bílasölu .......;-)

Verð að passa mig á að vera ekki svona lengi fram eftir á nóttunni að vesenast, blogga, lesa o.þ.h.
Vaknaði kl. tæplega 7 í morgun eftir alltof lítinn svefn. Fór niður í morgun þar sem ég gat ekki sofið, dreif mig í föt og út með Vask. Veðrið var eins og í ævintýri. Púðursnjór á jörðu, fastastilla og svo jólalegt að það vantaði bara Betlehemstjörnu á skallann á mér og allt hefði verið fullkomnað. Labbaði með Vask út í holtið og honum leiddist ekki. Svo sópaði ég snjóinn af öllum bílunum (þessi bílafloti fjölskyldunnar er nú að verða klikkun). Bens, Volvo, Reunault, Golf, Yaris og Subaru, af hverju á Kamilla Sif engan bíl.....??
Reyndi að vinna skipulega niður listann minn, byrjaði á að fara niður á Landsspítala og keypti stóra lyfjaboxið sem Laufey hjálpaði mér svo seinna um daginn við að raða lyfjunum mínum upp á nýtt í. Næst var peysan frá mömmu á dagskrá, fór niður á Skólavörðustíg, fann handprjónamarkaðinn eftir leiðbeiningar frá múttu. Ég lagði hvítu peysuna inn hjá þeim og mátaði fyrst 2 grænleitar peysur en það var síðan blá + fleiri lita hneppt peysa sem valdi mig og málið var dautt. Ég er ótrúlega ánægður með valið, hef ekki átt svona fallega lopapeysu fyrri, allavega ekki síðan tengdamamma prjónaði á mig peysur í gamla daga, hún var og er mjög flink við þetta.
Náði loksins að muna eftir að fara í Tímadjásn í Grímsbæ og kaupa keðju á krossinn minn frá mömmu. Veit ekki hvað er langt síðan keðjan slitnaði. Fór svo í MK eftir hádegið, langt síðan ég hef farið og var búinn að tala um það við ÁEG að ég kæmi kannski í dag (það var einkunnaafhending, prófsýning, val o.þ.h.) við þurftum náttúrlega hvorugt að vera þannig lagað séð (hvorugt okkar með umsjónarnema núna) en gott fyrir hana að sjá hvernig þetta virkar. Hitti líka fullt af fólki sem var mjög gaman. Held ég sé að renna á rassinn með að fara að standa í bakstri á stollen, lagtertum o.þ.h. held ég meiki það bara ekki. Það er morgundagurinn, ef ég verð hyberhress þá kannski gerist eitthvað við sjáum til. Ég á reyndar mjög erfitt með að sjá fyrir mér jólin án míns eigins Stollen með góði hangikjöti (er maður klikkaður eða stórklikkaður). Tveir góðir áfangar náðust þó í dag. Elli bróðir hringdi í mig með þeim afleiðingum að ég keyrði til hans í vinnuna og sótti ......... jíbbijei snjóhvítu rjúpurnar 10 sem hann er búinn að redda fyrir aðfangadagskvöld. Borgum 1500 kall fyrir stykkið en gerum það með bros á vör alíslenskar berjalyngsrjúpur (slurp og slef). Á eftir að fá 3 stk til viðbótar sem við vorum búin að fá gefins þannig að það er jafnvel búið að redda restmáltíð í tartalettum líka;-) Hinn áfanginn er sá að Bjarni Grétar tók að sér að mála gestasalernið í hólf og gólf og honum sækist það mjög vel. Búinn að fara tvær umferðir yfir veggi og loft og eina yfir gólfið, ætlaði að geyma seinni umferðina til morguns en er nú búinn að taka þá bráðskynsamlegu ákvörðun að mála hana núna áður en hann fer að sofa. Þá þornar þetta í rólegheitum í nótt og hann á þá bara eftir að skrúfa herbergið saman aftur á morgun;-) Ég mundi líka eftir að fara í Apótekið á landsspítalanum til að kaupa stærra lyfjabox fyrir lyfin mín. Laufey Sif hjálpaði mér svo að raða lyfjunum upp á nýtt miðað við að nú hef ég fleiri hólf (fleiri pilluátstíma) upp á að hlaupa.

Aðal- og aukaleikarar - "Annars verður mér að mæta!"

Jæja sit hér við morgunverðarborðið kl. 9. og blogga (hljómar eitthvað svo cool). Birna og Laufey Sif farnar í vinnu og Kamilla Sif komin til dagmömmu. Carl kominn á ról, er að undirbúa sig við að fara að að læra undir rekstrarfræði sem er síðasta prófið hans í HÍ (allt tekur enda) Prófið er á fimmtudaginn og hann er að fara að ljósrita eitthvað sem hann vantar fyrir undirbúninginn. Bjarni Grétar er sofandi (var í einhverju pókerspili með vinum sínum fram eftir í nótt). Hann er með það verkefni á höndum í dag að mála gestasalernið sem ekki hefur verið málað síðan af fyrri eigendum hússins okkar. Þess vegna ætla ég ekki að gefa honum nema svona til kl. 10 - 11 í bælinu;-( Ég veit ég er alltaf að endurtaka mig en það er ólýsanlega notalegt að vera hérna heima í rólegheitunum. Kalli er kominn niður í morgunmat, fínt að fá félagsskapinn. Ég var að hugsa mikið um fólk, vinskap o.fl. í gærkvöldi þar sem ég sofnaði frekar seint. Önnu Sigríði varð (í gær) tíðrætt um tengslanetið okkar, þ.e.a.s. hvað við eigum mikið af góðu fólki í kringum okkur. Það er nú þannig að maður tekur svoleiðis hlutum alltof sjálfsögðum. Stundum er sagt í gríni "þú velur þér vini en þú ræður engu um það hvernig fjölskyldu þú færð". Þegar börnin manns fara að slá sér upp og "aukaleikendur" (þau byrja nú þannig þessar elskur), fara að koma inn á heimilið. Maður gleymir oft hvað það er erfitt að koma svona inn í nýja fjölskyldu og reyna að fóta sig jafnvel í samkeppni við aðra "aukaleikara". Ég held samt að það sé best að taka þessum krökkum bara af virðingu og þægindum, vera ekkert með of mikil afskipti en reyna að koma til skila ákveðnum boðum. Ég er alla vega ánægður með þessar elskur sem eru á heimilinu okkar núna.

Ég man alltaf eftir því sem mig minnir að sé eina skiptið sem tengdapabbi minn heitinn lagði mér heilræði varðandi samband mitt við Birnu mína. Þá vorum við staddir í veiðiferð á Arnarvatnsheiði, hvar er betri vettvangur fyrir heilræðagjöf. Bjarni (tengdó), Sævar (vinur hans og mágur) og ég nýgræðingurinn og bílstjórinn í ferðinni:-) Þá man ég að Bjarni sagði að ég væri, eins og hann sjálfur varðandi Grétu, heppnasti maður í heimi með að hafa krækt í Birnu. Þær væru svo líkar á margan hátt. Svo kom það: "Þú verður gefa mér bara eitt loforð, að vera alltaf góður og heiðarlegur við Birnu mína annars verður mér að mæta". Þetta var sagt í þéttum góðlátlegum tón undir "mjúkum kringumstæðum" og það skilaði sér fullkomlega. Það er ekki eins og það hafi þurft stórátak af minni hálfu að efna þetta loforð gegnum árin, (ég vona að mér hafi tekist það í það minnsta í aðalatriðum). Allir sem þekkja Birnu mína vita fyrir hvað hún stendur. Lilja frá heimahlynnningunni kom kl. 11 og hjálpaði mér með að koma betra skipulagi á lyfin mín. Við fjölguðum lyfjatímum úr 3 í 4 og ég þarf þar með að kaupa nýtt box með fjórum hólfum pr/dag. Held að þetta verði miklu jafnara og betra svona. Óþægilegt að vera að taka allt upp í 13 töflur í hvert skipti;-( þegar það er ekki endilega nauðsynlegt. Heimahlynningin kemur næst á Þorláksmessu, þriðjudaginn 23. des kl. ca 11 (muna það). Fór á flandur og kláraði smáerindi sem höfðu safnast upp óafgreidd. Fór og skipti afmælisbókum (veit, eða a.m.k. vona, að ég móðgi engan með því). Skipti bókum frá Sigga og Guffu (John Grisham) og Sigurjóni og Kristínu (Saga forseta). Tók í staðin nýju bækurnar eftir Stefán Mána (Ódáðahraun), Yrsu (Auðnin) og Árna Þórarinsson (Sjöundi sonurinn), allt bækur af óskalistanum mínum þannig að ég er í hrikalega góðum lestrarmálum á næstu vikum:-) Fór í Glóey og keypti slatta af ljósaperum sem vantaði víða um húsið. Það þarf nú eitthvað að fara að skoða verðlagningu á ljósaperum held ég, 11 ljósaperur á tæplega 14 þúsund krónur er ekki í lagi að mínu mati. Ætlaði næst að bruna á Skólavörðustíginn í prjónabúðina þar sem mamma keypti hvítu ullarpeysuna sem hún gaf mér. Peysan er æði en mér finnst hún kannski heldur stór svo ég ætlaði að skoða hvort ég sæi eitthvað sem passaði betur en þá hringdi strákurinn úr Elkó (Guðni) og sagðist verða í Berjarimanum eftir 10 mínútur svo það var ekki um annað að ræða en bruna upp eftir. Niðurstaðan varð sú að byrja á að skipta út afruglaranum og skarttengjunum, líklegast að aukahljóðið tengist afruglaranum. Laufey Sif er búin að panta pössun fyrir KSC í kvöld, ætlar að borða með vinkonum sínum á Horninu. Þær hafa haft þetta fyrir sið að í staðin fyrir að gefa hvor annarri jólagjöf þá gera þær þetta. Mér finnst þetta þrælsniðugt. Ég ákvað að elda spaghetti Bolognese a l´a Ingó. Ég er búinn að vera með extra mikla matarlyst undanfarna daga og um að gera að nýta sér það. Ég borðaði hrikalega mikið (sem er bara fínt, ekki veitir af). Hlustaði á Atla vin minn í útvarpinu seinni partinn í dag þar sem rætt var við hann um nýtt markaðsátak Nóa Síríusar á bakara- og stóreldhúsamarkaðinn. Einnig var talað við Steina vin minn í "Okkar bakarí" en hann hefur verið frumkvöðull í að taka inn súkkulaði frá Nóa og aðlaga í framleiðsluna þeirra. Þeir eru komnir með tertur og kökur þar sem sérstaklega er gert út á hið sérstaka og sígilda bragð af Nóa súkkulaði sem íslendingar elska. Mér finnst ég eiga svolítið í þessu framtaki, hef lengi róið í bæði Atla, Steina og fleirum varðandi þetta mál. Þótt mikið sé til af góðu súkkulaði á markaðnum þá hefur það alltaf pirrað mig sem fagmann að N.S. skuli ekkert hafa sinnt þessum markaði (nú eða öfugt, menn verða svo sem líka að bera sig eftir björginni). Veit að Atli er ánægður með að þetta er komið af stað, ég vona bara að hann fái verðskuldaðan stuðning við þetta mál hjá N.S., hann er virkilega búinn að hafa mikið fyrir þessu máli. Birna kom fyrr heim en hún ætlaði sér, bæði var hún hálfslöpp en einnig vegna pössunarinnar sem var fyrirhuguð. Kamilla Sif var reyndar þæg sem lamb og allt gekk vel fyrir utan það að krakkinn gerði heiðarlega tilraun til að hengja sig í silfurhálsmeninu sínu. Náði einhvern vegin að krækja keðjulásnum í eina sylgjuna á gönguskó afa síns og allt í einu heyrði amman skrítin hljóð úr barnsbarka og sá sér til skelfingar að KSC var dragandi heljarinnar fjallaskó undir hálsinum á sér. Amman sýndi snarræði, sleit keðjuna og lífi barnsins var þar með bjargað;-) Heyrði í Sigga bró um kvöldmatarleytið, var á leið á hljómsveitaræfingu, held að þeir séu að meika það fyrir alvöru núna. Hann lýsti fyrir mér að þeir hefðu, á síðustu æfingu, náð að æfa öll þrjú flottu lögin með Dooby brothers með röddun og ÖLLU. Ég efast reyndar ekkert um að þetta sé mjög skemmtilegt hjá þeim. Allt músikalskir strákar (á besta aldri), búnir að koma sér upp ágætis búnaði og aðstöðu - ÖRUGGLEGA BARA GAMAN! Ég heyrði svo líka í Atla aftur í kvöld en þá voru nú heldur leiðinlegri fréttir. Mamma hans (97 ára) hafði verið að koma úr Bónus (hópferð með rútu frá elliblokkinni) og stóð með pokana sína fyrir utan rútuna þegar hún datt svona illa í hálkunni og mjaðmargrindarbrotnaði. Hrikalegt! Það má búast við að það geti orðið lengi að gróa.

Home sweet home!

Átti frekar ónæðissama nótt. Herbergisfélagi minn var í einhverjum vandræðum með skammtarann sinn og hann pípti stöðugt. þetta var nú mest til sjálfum mér að kenna. Félaginn var búinn að vara mig við því að hann svæfi fyrri hluta næturinnar í Lazy Boy stólnum í setustofunni vegna verkja. Síðan væri hann vanur að færa sig yfir inn í rúm. Auðvitað átti ég að einbeita mér að því að sofa meðan hann var í setustofunni. En ég var eitthvað upprifinn eftir þessa frábæru Karlakórstónleika og fór bara að lesa. Svo loksins þegar ég var nýsofnaður þá kom félaginn með pípandi tækið sitt og ég vaknaði á 20 múnútna fresti eftir það. Fór að blogga snemma í morgun frekar heldur en að telja kindur og las áfram í Sólkrossinum. Fínasta bók sem heldur mér ágætlega við efnið. Friðbjörn læknir kom og spjallaði lengi við mig. Ákveðinn í að útskrifa mig en vill að ég komi á fimmtudaginn í viðtal eins og um var talað og með ferska blóðprufu með mér. Ekkert mál! Gengið frá nýju lyfjakorti. Mikil pressa kom allt í einu frá bráðamóttökunni að fá rúmið mitt til afnota þannig að ég hringdi snarlega í Bjarna Grétar og sagði honum að ég væri tilbúinn og hann mætti koma og sækja mig. Svo var bara að pakka því litla niður sem ég var með. Fór í apótekið (einu lyfinu bætt við) og sótti mér viðbót á orkudrykki og built-up. Svo kvaddi ég starfsfólkið og við Bjarni fórum heim. Mikil lifandis skelfing var gott að koma heim. Séra Anna Sigríður varð ljúflega við beiðni um að koma til okkar og ræða málin varðandi veikindin, lífið og tilveruna. Hún sat hjá okkur hátt á annan klukkutíma og það var bara indælt og gott. Hún er bara svo frábær og þekkir okkur orðið svo vel og okkar sögu. Ég uppgötvaði allt í einu að nú koma lyfin ekki bara til mín þegar ég á að taka þau heldur þarf ég að bera mig eftir þeim. Var búinn að steingleyma svoleiðis smámunum. Sem betur fer kom Laufey Sif ákkúrat heim í þann mund sem éga var að fara að byrja að taka lyfin til í boxið mitt. Hún er svo ansi röggsöm í þessu og klár. Við vorum eldsnögg í þessu saman, aðallega hún samt. Mamma kom við, var á leið til Rúnu frænku. Hræðilegt áfall hjá henni að koma að syni sínum látnum í gær en segja má að þar sé líka hugsanlega ákveðinn léttir á ferð þar sem hann hlýtur að hafa verið orðinn lúinn á streði í baráttunni við fíkniefni í mörg undanfarin ár. Mannlegt eðli þolir bara ákveðið og einhvern tíman fá menn nóg. Birna fór í aðventusaumó hjá Fjólu, stelpurnar eiga að koma með gjöf með sér og nú á að hafa það huggulegt. Gott hjá þeim. Sendi Bjarna á KFC til að kaupa kvöldmatinn, át eins og ég hefði ekki fengið að borða í viku. Brynja hringdi til að minna mig á að á morgun á ég að hringja í Guðna í Elko og láta laga aukahljóðið í sjónvarpinu. Lesið í maraþoni í Sólkrossinum núna. Spennnan magnast.

Birna komin heim úr saumó alsæl. Fékk einhvern voða dúllulegan kertastjaka í "jólagjöf" Góða nótt.

Friður á jörðu

Enn einn morguninn vakna ég í sæluvímu eftir frábæra upplifun á menningarsviðinu frá kvöldinu áður. Aðventutónleikar Karlakórs Reykjavíkur í Hallgrímskirkju eru fyrirbæri sem ég á nú að vera orðin vanur án þess að vera í andköfum. Ég er búinn að taka þátt í þessu sem kórmaður í það mörg ár og alltaf fundist þetta jafn gaman. Vortónleikar KR eru alltaf skemmtilegir en aðventu-tónleikarnir hafa skapað sér sess meðal þjóðarinnar sem ómiss-andi þáttur í aðdraganda jólanna. Segja má að Karlakórinn hefji þessa lotu með því að syngja í aðventumessu 2. sunnudag í aðventu. Fjórum sinnum fyllir kórinn svo Hallgrímskirkju (4 sinnum, þetta stóra volduga hús). Það var troðfullt hús í gærkvöldi og reynda var þannig á öllum tónleikunum. Það þurfti að setja stóla ansi víða en mér sýndist þó að þokkalega færi um tónleikagesti. Stjórn kórsins var svo elskulega að bjóða mér og fjölskyldunni á lokatónleikana og tók frá sæti fyrir okkur á fremsta bekk. Sátum þar í góðu yfirlæti með fjölskyldu Friðriks kórstjóra, Bjarni Færeyjingur og fólk á hans vegum. Það var mjög gaman að prófa að sitja svona á fremsta bekk og upplifa nálægðina og aflið sem þessi kór býr yfir. Kórinn byrjaði á að ganga inn kirkjuna syngjandi Alta trinita beata, alltaf tilkomumikið. Kórinn hélt síðan áfram söngnum skiptur og kallaðist á í Ave Maria eftir Franz Biebl. Þessa Maríu hef ég ekki sungið svo ég muni, mjög falleg. Eftir það rann kórinn í hefðbundna uppstillingu undir orgelinu og aðventulögin runnu hvert eftir annað. Allt vel gert. Sveinn Dúa Hjörleifsson söng einsöng með kórnum í Panis angelicus og strax á eftir í Ave Maríu Schuberts (ótrúlega áreynslulaust og vel sungið). Sveinn er að þroska með sér þéttleika og öryggi í röddina sína og það heyrist vel. Ásgeir Eiríksson steig fram og söng Ó helga nótt af sinni alkunnu snilld og smekkvísi. Samkvæmt dagskrá átti hann að syngja Agnus Dei strax á eftir en því var sleppt. Ég frétt það eftir tónleikana að hann væri lasinn í hálsinum og það getur alltaf komið fyrir. Við sem hlustuðum á hann syngja Agnus Dei í vor munum vel eftir þeirri snilld. Sveinn Dúa kom svo aftur fram og tók tvö lög í viðbót tónleikagestum án efa til mikillar gleði. Lögin sem Sveinn söng voru Friður á jörðu eftir Árna Thorsteinson og Ave María eftir Kaldalóns.

Þessi lög voru sungin af ótrúlegri næmni og hittu fólk beint í hjartastað. Ég heyrði verulega mikið snökkt allt í kringum mig. Ég hitti Svein eftir tónleikana og ég sagði við hann að hann hefði skellt mér á magann í mitt Kaldalónið, ég fór að grenja eins og kjelling. Þannig var nú það. Svenni hló nú bara og sagði að það væri allt í lagi ég hefði hvort sem er alltaf verið kjellling;-)

Sunnudagur til sælu

Ég get illa hætt að hugsa um tónleikana í gærkvöldi. Er að upplifa sumt aftur og aftur. Það er svo ótrúlega notalegt að vera til hafandi verið þátttakandi í einhverju svona sérstöku eins og svona vönduðum listviðburði. Ég veit að ég er ansi háfleygur núna og eflaust er eitthvað annað en Emilíana sem spilar þar inn í. Samt sem áður er ég á því að það er ekki sjálfgefið og það er alls ekki á hverjum degi sem maður fær svona konfektmola upp í hendurnar. Jæja, yfir í aðra sálma. Sit nú eins og kalltípan (held hann hafi verið hagfræðingur) sem var einu sinni í spaugstofunni, raðaði öllu í kring um sig og svona vildi hafa allt nálægt sér. Ég er að horfa á Silfur Egils, er að blogga, fylgjast með Facebook, kaffibollinn er á náttborðinu við hliðina á bókinnni sem hefur ekki verið snert síðan í nótt. Svo sagði Bjarni Haukur að karlmenn gætu bara gert eitt í einu - KJAFTÆÐI:)

Í nótt sofnaði ég seint eins og undanfarnar nætur en sofnaði þá líka mjög vel. Ég er búinn að ákveða að fara með Sifjurnar mínar, Laufeyju og Kamillu, á jólaball í MK núna kl. 15:00. Ætla að monta mig af stóreignunum mínum. Kann samt ekki við að biðja Bjarna og Betu að koma með á jólaballið ;-) Væri kannski aðeins of langt gengið i montinu. Svo eru það karlakórstónleikarnir í kvöld kl. 8. Eintóm sæla, varla að ég nenni að fara að lúlla uppi á spítala í nótt en ég set bara traust mitt á að allt gangi vel og að ég verði útskrifaður á morgun, eins og planað er, og þurfi ekkert að koma þangað fyrr en eftir jól (og helst áramót) á ný. Hugsa sér að nú er að líða að því að það verði ár síðan ég greindist . . . . . . "drrrrrr búmm" burtu með svona pælingar, þessar dagsetningar skipta engu máli. ÞAÐ ER DAGURINN Í DAG SEM SKIPTIR MÁLI!

Við fórum á jólaballið í MK og það var bara mjög skemmtilegt. Ásthildur hafði náttúrlega verið á fullu í undirbúningnum eins og hennar var von og vísa. Sá um kakóið (held ég hafi drukkið 4 bolla með kúfuðum rjóma, nammmmm) og svo bakaði hún helling af jólakökum, rúllutertum og piparkökum. Mé er alveg sama þótt eitthvað af bakkelsinu hafi haft viðkomu í kæli eða frysti, þetta er allt saman fyrirhöfn. Kamilla Sif tók jólasveininum af talsverðri varúð svona fyrst en þegar hún uppgötvaði að hann var búinn að gefa henni blikkandi dót í barminn þá leist henni strax miklu betur á kauða. Við skemmtum okkur öll ágætlega, Laufey Sif rifjaði upp kynni sín af Sigríði sem kenndi henni íslensku í Rimaskóla á sínum tíma og mér fannst æðislegt að hitta svo marga af vinnufélögunum við svona skemmtilegar aðstæður. Eftir jólaballið komum við við í Nettó í Hverafold. Vantaði kartöflur og eitthvað smáræði fleira í hrygginn sem Birna ætlar að hafa í matinn í kvöld. Við björguðum því og brunuðum heim. þá var maturinn að fara inn í ofn (kl. 17 )þannig að þetta lítur allt saman vel út. Rétturinn heitir Lamb de Provenge og eftir að hafa gætt mér á þessum rétti þá verð ég að segja, íslenska lambið rokkar. Frábær matur og Birna hitti á eitthvað spes þarna. Kjötið hafði staðið úti í sólarhring og ég veit að það skiptir miklu máli en það var eitthvað meira en það. Hryggurinn ásamt kartöflum, sætum kartöflum, gulrótum og eitthverju fleiru grænmeti + krydd provenge sem Birna átti ekki en setti eitthvað Nóatóns lambakrydd í staðin var sett í ofnfast fat í 30 mínútur á 250°C. Síðan sett á borðið með meðlæti eins og grænum Ora baunum og rauðkáli og sultu. ÞETTA VAR BAAARA GOTT. Svo er bara að drífa sig á Karlakórstónleikana. Bjarni Grétar og Elísabet komu heim rétt áður en við fórum og fóru náttúrlega beint að fá sér að borða. Þau voru mjög hrifin af tónleikunum og sama sögðu foreldrar Betu. Við fengum fallega sendingu frá þeim (skreyttan konfektkassa) með þakklæti fyrir miðana á tónleikana. Ég ætla að blogga um tónleikana í fyrramálið því ég fer beint upp á spítala á eftir og verð ábyggilega latur að fara að standa í að skrifa seint í kvöld.

Mamma mia, kominn Laugardagur;-)

Mamma mía!!! Það var orðið em ég sofnaði með í höfðinu í nótt:-) Fékk sms frá Birnu minni kl. rúmlega 12:00. Þá var hún komin til Brynju vinkonu og þær sátu með gott í glasi og horfðu á diskinn Mamma Mía. Helv var ég ánægður með þær. Hefði náttúrlega verið skemmtilegast að vera með þeim. Atli hafði skellt sér í . . hmmm hvernig var sagan aftur . . . upp í hesthús. Ég vissi ekki að Atli ætti hesta :-))))) svona geta sögurnar orðið óóóótrúlegar. Ég hef greinilega sofnað með ljósin kveikt því þannig vaknaði ég um kl. 5 í morgun með bókina á bringunni. Gat lítið sofnað eftir það. Fékk morgunmatinn (mína uppáhaldsmáltíð) kl. 8:45 og eins og venjulega spændi ég hann í mig með bestu lyst. Fór aftur upp í rúm með bókina en fann að ég var mjög syfjaður enda datt ég út af fljótlega. Birna hringdi, hún var bara hress eftir gærkvöldið, hafði setið til kl. 3 hjá Brynju og Atla. Nánari útlistun kom á hesthúsamálinu. Auðvitað tengdist það Árna Birni vini Atla, hann tengist e-h hestum og/eða hestamönnum. Atli hafði meira að segja tekið fram betri svuntuna þegar hann kom heim og steikti egg og beikon handa stelpunum, svona á að gera þetta. Eftir að við Birna kvöddumst hringdi ég í mömmu til að láta hana vita stöðuna. Hún var auðvitað alsæl með að allt væri svona í lukkunnar velstandi. Alltafa gaman að hringja góðar fréttir til hennar, verður alltaf svo innilega glöð þessi elska. Ég var mældur (36,8:-) og allar aðrar tölur eftir bókinni líka svo þetta lítur allt saman vel út. Helgi (vakthafandi krabbameinslæknir) kom í heimsókn til að ræða hugsanlega útskrift eða heimferðarleyfi. Hanna hallast að því að ég fái að fara heim í leyfi yfir helgina með það í huga að útskrifast á mánudag ef allt gengur vel. Ég er sáttur við það (öryggið á oddinn;). Þannig að nú er allt komið í gang með undirbúning. Fara yfir lyfjamálin o.s.frv. jibbí. Aldrei þessu vant var maturinn frábær. Engu líkara en liðið ætli að tryggja að ég fara strax að sakna spítalans. Hjúkkan mín var að fara frá mér rétt í þessu. Ég má sem sagt fara heim núna og á að koma aftur á sunnudagskvöld og sofa hér aðfararnótt mánudags. Svo er stefnan sett á að útskrifa mig á mánudaginn eins og áður hefur komið fram í þessum þætti;-) Ég er kominn með öll lyfin skipulega pökkuð og merkt. Nú er ég að fara að pakka niður, Laufey Sif ætlar að sækja gamla kallinn. Hún kom stuttu seinna og nú er afi að monta sig og labbar með Kamillu um alla deildina. Hún vekur mikla lukku eins og við er að búast.

Þegar heim var komið var sest við eldhúsborðið og haldið áfram að borða Bakaríisdót og kjafta saman, hvað er betra. Birna þurfti að fara í búðarstúss svo ég fór að snúllast eitthvað, setja orðabækurnar inn á fartölvuna og svo lagði ég mig í 3 korter. Við ákváðum að bjóða foreldrum Betu á aðventutónleika Karlakórsins af því ég veit að þau hafa gaman af þeim. Valdi gat tekið frá fyrir mig miða og Bjarni Grétar fór fyrir mig og gekk frá þeim málum. Reyndar asnaðist ég til að senda hann í Langholtskirkju í staðin fyrir Hallgrímskirkju, maður er svo sannarlega á lyfjum. Hef ekki heyrt í Bjarna síðan en vona að þetta hafi allt saman reddast. Við Birna drifum okkur af stað út í Háskólabíó til að ná Emilíönu á réttum tíma. Fólk var að streyma að og allt að fyllast. Við hittum Sigríði kennara úr MK, kenndi reyndar Laufeyju í Rimaskóla á sínum tíma, hún minnti mig á jólaball MK á morgun kl 15. Kannski við skellum okkur, aldrei að vita. Kastaði kveðju á Tonny, gamla kunningja úr Álfheimabakaríi, þar sem hann straujaði ábúðarmikill fram hjá mér í upphafi tónleika. Lay Low hóf tónleikana með upphitun 20 mínútum of seint. Hún spilaði í hálftíma og náði að kynda vel upp í mannskapnum. Hún er gríðarlega mikil orginal tónlistarkona sem á auðvelt með að hrífa mann með sér.

Það sem hins vegar kom dálítið á óvart var að þegar hún var horfin af sviðinu var tilkynnt 20 mínútna hlé þar til Emilíana byrjaði. Það var greinilega bara gert í þeim tilgangi að selja léttvín og bjór. Svo sem allt í lagi ef tímaplanið hefði staðist en ég játa á mig smá pirring þegar pásan var farin að nálgast 40 mínútur. En þá steig drottningin á svið ásamt föruneyti sínu og byrjaði að spila eftir smá fát og fum í uppstillingu. Eftir það var ekki aftur snúið. Allur pirringur hvarf eins og dögg fyrir sólu og tónlistin greip mann heljartökum. Kátínuleg, nánast barnsleg, sviðsfram-koma Emilíönu gerði það einnig að verkum að þrátt fyrir að tónlistin væri heildræn og sinfónísk á köflum þá varð sjálft "showið" aldrei yfirdrifið á nokkurn hátt. Hún sagði sögur sem henni virtust detta í hug á staðnum, gerði grín að bandinu og vinum sínum og ruglaði jafnvel innkomur og lagaval á köflum. Hugsanlega hefur einhverjum þótt þetta draga úr fullkomnun á yfirbragði tónleikanna en fyrir mér undirstrikaði þetta hvað hún hefur tónleikaformið í raun vel á valdi sínu. Bandið er stórgott og fremstur meðal jafningja er Sigtryggur nokkur Baldursson sem fer algjörlega á kostum á slagverkinu. Sannkallaður virtuos sem gæðir lög Emilíönu því sem þarf án þess að gera nokkurn tíman of mikið. Við hittum Atla og Þórdísi, vinafólk Sigga og Guffu, bæði fyrir og eftir tónleika og ekki var annað að heyra en þau væru sammála okkur í hrifningunni.

Kom við á 11-E eftir tónleika og lét stelpurnar taka nálina úr handleggnum á mér þvú bæði var mig farið að verkja í legginn og svo voru umbúðirnar ansi bosmamiklar. Eftir það brunuðum við niður á Bæjarins Bestu og fengum okkur þjóðarrétt íslendinga, eina með öllu og kók. Það er að segja þetta fékk Birna sér en ég fékk mér tvær með tómat, sinnep og steiktum og kók (reyndar deildum við kókglasinu svo öllu sé nú haldið til haga). Á leiðinni heim heyrði ég í Atla vini, rammhásum, sá var ekki hress með Frostrósatónleikana í Laugardagshöllinni. Sagðist hafa stungið af úr húsi þegar klukkutími var eftir , farið út í bíl og hímt þar, þar til Brynja kom. ALDREI, ALDREI, ALDREI aftur skal ég láta draga mig í svona vitleysu sagði hann. Ekki einu sinni þótt ég fái greitt fyrir það. Ég er nú reyndar ekki viss um að hann sé að meina þetta síðasta;) En allavega fór ekki á milli mála að honum hafði slegið illilega niður við þetta brölt sitt. Nú er Birna farin að hrjóta svo vært og sætt við hliðina á mér að ég ætla að láta þetta duga í kvöld. Enda hætt að vera eitthvað vit í þessu röfli hvort sem er.

Siggi bró. Pípulagningar, reiði, gleði, menning o.fl.

Búinn að hugsa svo mikið um margt af því sem við Siggi bró vorum að fílósófera um í gærkvöldi. Þarf eiginlega að fá hann aftur sem fyrst:-) Friðbjörn (læknirinn minn) rölti fram hjá hurðinni minni kl. 8 í morgun. Stoppaði í hurðinni mjög sposkur á svip og sagði: Kl. 11 - sjáum til - lofa engu -
og var þar með farinn. Ég ætla bara að vera bjartsýnn áfram, flauta og blístra saman (prófiði það;) Er að reyna að laga (lesist:fikta) í uppsetningunum á bloggsíðunni. Þetta "Blogger" er greinilega bloggform frá tímum risaeðlanna. Ég er að hugsa um að reyna að fá smá aðstoð frá S. Sævarri svila mínum, þeim eðaldreng og reynslumikla blogghundi, til að hjálpa mér eitthvað með uppsetningar við tækifæri. Stofugangurinn (læknahópurinn) kom við hjá mér og það er greinilegt að allir eru meðvitaðir um að Friðbjörn er reiður og vill að ég komist í speglunina á eftir. Vonandi gengur þesi stríðsáætlun hans upp.
Hringdi í Sr. Önnu Sigríði Dómkirkjuprest og fjölskylduvin leyfi ég mér að segja. Hún er orðin svo ótrúlega tengd okkur eftir undanfarin ár og hefur reynst okkur eins og klettur. Það hefur lengi staðið til að fá hana til að setjast niður með fjölskyldunni í notalegt spjall og hún tók, eins og við mátti búast, vel í það. Stefnan er að hún hitti okkur í Berjarimanum kl. 15 á mánudaginn n.k. svo framarlega sem ég fæ heimferðarleyfi. Í verra fallinu myndum við hittast á spítalanum en mér hugnast það nú síður. Obbosí kl. er hálf ellefu og verið að ná í mig til að fara í speglunina, frábært. Meira á eftir. Birna var svo hjá mér þegar ég rumskaði uppi á herbergi. Allt gekk vel eftir því sem sögur herma. Einar Oddsson, sá sem tók mig að sér setti annað rör innan í stálrörið (þarf maður ekki að vera pípulagningamaður í svona verkefni). Ég var sársvangur eftir bröltið og pantaði te og ristað brauð með tilbehör. Núna þegar ég hef borðað líður mér nákvæmlega svona:

Nú er ég glaður

Nú er ég glaður á góðri stund

sem á mér sér.

Guði sé lof fyrir þennan fund

og vel sé þeim sem veitti mér.

Vitjað hef ég á vinamót

sem nú á sér.

Reynt af mörgum hýrleg hót

og vel sé þeim sem veitti mér.

Höfundur lags: Íslenskt þjóðlag

Höfundur texta: Hallgrímur Pétursson

Útsetning: Sigursveinn D Kristinsson

Bryndís og Hilmar smitsjúkdómalæknar komu og fóru yfir stöðuna. Smitgát vegna Klostredíums er lokið og þau eru helst á því að taka pásu í sýklagjöf í forvarnarskini. Verður skoðað betur á næstunni. Bjarni Grétar og Beta komu í heimsókn, frábært að fá þau í innlit. Þau voru bæði hress, bæði búin í prófum og einhver gleðskapur fram undan í kvöld að því að mér skilst. Bjarna gekk ekki alveg eins vel í eðlisfræðiprófinu og honum hafði búist við. Henn hafði reiknað með að taka 10 en sagði að prófið hefði verið svínslega erfitt og vorkenndi þeim sem ekki hefðu undirbúið sig vel. Sjáum til hvað kemur út úr þessu. Nú ætla ég að taka smá letikast og leggja mig. ...seinna... Knock, knock, Friðbjörn kíkti við. Hafði hitt Einar Oddsson og fékk ég nú nánari skýringu. Stífla í gallvegi fyrir neðan stálrörið. Hann setti plaströr sem dekkaði þann hluta svo nú á gallvegurinn að vera fóðraður. Skolaði svo allt gumsið út. Ég verð á sýklalyfjatöflum eitthvað áfram (skoðum forvarnarmálin seinna eins og Bryndís og Hilmar sögðu). Ef gulan fer (sem Friðbjörn reiknar með) þá fer ég heim. Tónleikar helgarinnar eiga alla vega að vera í lagi. Ergó: VIÐ FRIÐBJÖRN FÖRUM GLAÐIR INN Í HELGINA. Sigurjón bróðir hringdi, allir í hans koti með ælupest nema Erla frænka. Siggi hringdi líka og sagði mér að hann hefði farið ásamt iðnaðarmönnunum vestur á Mýrar og klárað að steypa í gólfið á bústaðnum;-) Það er frábært að það skuli vera frá, bara eftir að grunna og þá er húsið í raun orðið rykfrítt og tilbúið undir tréverk. Skemmir aðeins fyrir að það skildi koma upp ósamkomulag við Mársa frænda vegna uppgjörsins, en eins og ég hef alltaf sagt, forðast í lengstu lög að blanda saman fjölskyldu og peningum. Það er ávísun á vandamál. Birna hringdi og spurði hvort hún ætti að færa mér eitthvað að borða, þá var ég nýbúinn að fá matinn á borðið og sat og hámaði i mig. Ekki slæmur matur í þetta sinnið, kjötbúðingur með grænmeti og, það sem gladdi mig mest, kakósúpa með tvíbökum. Þannig að ég er bara saddur og sáttur núna:-) Birna var hjá mér í góða stund, við getum samglaðst yfir breyttri stöðu núna og vonum að ég geti farið heim á morgun. Hún skellti sér svo á Nings (enda ein að borða í kotinu) keypti sér svínapurusteik sem hún fór með heim, skellti hvítvíni í glas og huggede sig lidt, ég er bara helv. ánægður með mína. Annað kvöld ætlum við að sjá Emilíönu Torrini í Háskólabíói kl. 20:00 og á Sunnudagskvöldið eru aðventutónleikar Karlakórs Reykjavíkur í Hallgrímskirkju kl. 20:00. Vá hvað mig hlakkar til að drekka í mig menninguna með spúsu minni:-) Þaetta var farið að líta frekar illa út með speglunina óafgreidda og ég þar með hálflasinn. Allt í betri áttina núna. Fer að leggja frá mér tölvuna núna, enda búinn að sitja ansi lengi við, og halda áfram með Sólkrossinn. Hún fór nú bara hressilega í gang, náði einhvejum 60 bls. áður en ég lagði hana frá mér. Mér sýnist Óttar samt ekki alveg ná sama dampi og með Hnífi Abrahams í fyrra en það er nú reyndar alltof snemmt að dæma um það strax.

Að skola út mótorinn . . á skurðgröfu . . fyrir jól"

Náði að lesa 20 bls. í Sólkrossi Óttars áður en ég fór að sofa í gærkvöldi. Svaf ágætlega. Vaknaði með 37,7°C sem eru ekki góðar fréttir þar sem ég á að fara í speglun og fleira skemmtilegt á eftir. Reyndar var aðstoðarlæknir að abba fram hjá mér rétt í þessu. Hann sagðist EKKI halda að þessi hiti muni tefja málið "jibbí" Fagnaði full snemma, var sóttur og keyrður niður í speglun. En Ásgeir vill ekki taka mig inn fyrr en seinna í dag (seinastan í röðinni vegna smithættu:-( Up we vent again. Þetta verður einhverntíma eftir kl 14:00. Búinn að lesa fréttablaðið, er að byrja á Mogganum og mesta hættan er að ég verði orðinn svo svangur að ég éti blöðin. Nú væri gott að geta laumast í flatkökubirgðirnar sem ég á frá henni Guffu í ísskápnum í setustofunni namminamm. Mamma kom til mín í hádeginu. Var að koma beint úr tásupússi hjá Eygló og var alsæl. Sat hjá mér langleiðina til klukkan tvö. Þóra hans Árna kom við hjá mér, var á leiðinni í viðtal hjá Friðbirni. Frábært hvað hefur gengið vel hjá henni undanfarið, hún er laus við allan krabba, þarf bara að koma í eftirlit. Sama með Árna eftir því sem ég best veit, þarf bara að koma í eftirlit. Þóra átti tíma kl. hálf tvö þannig að hún kvaddi okkur en um sama leiti kom Ásgeir Theódórs rörasérfræðingur askvaðandi og eitthvað var hann verulega stressaður. Ég fékk á tilfinninguna að það væri eitthvað farið að þrengjast um aðgerðina mína en þegar ég spurði hann lofaði hann að reyna allt sem hann gæti til að koma mér að. Það endaði svo auðvitað þannig að kl. hálf þrjú komu læknir og hjúkka og tilkynntu mér að spegluninni hefði verið frestað til þriðjudags:-( Skýringarnar voru það mikið út og suður að ég nenni ekki einu sinni að hafa þær eftir enda verð ég bara pirraður aftur ef ég fer út í þá sálma. En hafi ég verið pirraður þá veit ég ekki hvaða orð ég á að nota um hana Birnu mína þegar ég hringdi í hana og sagði henni tíðindin. Hún var alveg öskureið og ég átti alveg eins von á henni akandi á skurðgröfu hingað niður eftir. Ég reyndi nú að róa mig niður enda vinnst svo sem ekkert við að hanga í fílu. Ég fékk þó að borða og nýtti mér það sko óspart, raðaði í mig ristuðu brauði og tei og óð svo í flatkökubirgðirnar mínar og borðaði þar til ég var að springa. Friðbjörn (minn mikli eðallæknir) kom við hjá mér kl. 5 og var ekki par hress með að frétta að spegluninni hefði verið frestað. Hann spurði hvort ég væri til í að vera fastandi í nótt og hann myndi sjá hvort hann gæti gert eitthvað með morgundaginn varðandi speglun. Þá er hann með annan lækni (Einar) í huga. Það var greinilega mjög þungt í honum og hann ekki sáttur með þessa þróun mála. Ég sagðist að sjálfsögðu vera til í að fasta og hann bað mig að hringja í sig kl 9 í fyrramálið ef ég væri ekki búinn að heyra í honum þá. Birna mín kom úr vinnunni, þreytt og líka bara pirruð yfir þróun mála. Við erum að vona að eitthvað komi út úr tilraunum Friðbjarnar með að redda tíma fyrir mig á morgun. Það væri frábært að koma þessu frá fyrir jafnvel þótt það setji eflaust mark sitt eitthvað á helgarheilsuna hjá mér. Ég skellti mér í sturtu og rakstur þegar Birna var farin og var eins og nýr maður á eftir, þvílíkur munur;-) Þegar ég kom úr sturtunni, hreinn og strokinn, var Siggi bró mættur á setustofunni. Hann þóttist ekki vera búinn að bíða lengi en mig grunar að það hafi nú verið talsverð stund. Hann kom með viðbót á lúpínuseiðið og brokkolíknippi. Að auki kom hann með 2 cd-diska sem einhver heilsugúrú hefur gefið út, ætla að kíkja á þetta við tækifæri. Við Siggi áttum langt samtal um heilsumálin í kjölfarið, mjög áhugavert samtal reyndar þar sem víða var farið og snert á ýmsum flötum. Margt höfum við rætt áður en tekið var á mörgu nýju. Þetta er þrælskemmtilegt umræðuefni og í grunninn held ég að við séum mjög sammála. Honum er mikið niðri fyrir hvað varðar áhrif lyfjaiðnaðarins og fleiri hagsmunaaðila á heilbrigðiskerfið og læknastéttina.

Björgvin Páll og "Stóra HK málið!!!"

Var að lesa fróðlega greina eftir Bjögga silfurdreng úr handboltalandsliðinu (nemanda minn úr bakaradeildinni) http://karenogbjoggi.bloggar.is/ Mér finnst þetta vel skrifað hjá Bjögga og sína vel að því fylgir talsverð ábyrgð þegar menn taka að sér að starfa við íþróttaþjálfun. Menn eru að fást við fólk (krakka) á viðkvæmum aldri og fáránlegt að nálgast 16 - 20 ára unglinga þannig að þeir séu bara viðskiptavara og hægt að gera við þá hvað sem er. Hér kemur sem sagt mitt svar til Bjögga (sem, mér til mikillar gleði, er nú orðinn Frammari;)

Þetta er dálítið fróðleg lesning Bjöggi minn sérstaklega fyrir mig sem stend svolítið á kantinum í þessu þ.e.a.s. þetta er ekki mál sem ég fylgdist mikið með. Mér finnst það bara áhugavert út frá þér sem fyrrverandi nemanda mínum í MK. Mér kemur það ansi dæmigert fyrir sjónir. þarna er metnaðarfullur strákur (jú, ég vissi alltaf að þú værir með skap;) að fást við hákarla sem vinna við svona mál alla daga. Þú ert svona heill og heiðarlegur drengur sem þolir ekki að hafa svona lausa móralska enda á eftir þér. Málið er því miður það að, hvernig sem maður reynir, þá verða alltaf svona „geðgóðar“ Migliusartýpur á veginum sem maður velur sér. Það verður bara að leiða þá hjá sér eins og hægt er, takast á við málin eins og þú hefur gert en samt án þess að taka þetta of mikið inn á þig, þarna voru aðrir gerendur, og þó klárlega þolandinn.
Ég finn að þetta hefur eðlilega haft talsverð áhrif á þig en þau hafa bara styrkt þig og opinberað litlu kallana í málinu. Ég er og verð alltaf Frammari og er að því leitinu ánægður með niðurstöðu málsins. Þannig er nú það . . . . . . .
Bestu kveðjur frá Ingólfi

Enn fleiri sýklar.... og Myrká

Ætlaði aldrei að sofna í gærkvöldi, klukkan var líklega orðin hálf tvö. Vaknaði um kl. 6. Dormaði reyndar talsvert eftir það með hléum. Morgunmaturinn var borðaður af sérlegri græðgi, hefur sjaldan bragðast betur þótt um væri að ræða sama matseðil og venjulega; hafragraut, LGG, ávöxt, ristað brauð með smjöri, marmelaði og osti og te. Sem sagt, óvenjugóð matarlist. Læknarnir á stofugangnum færðu mér þær gleðifregnir að til viðbótar við Klostredíum hefðu ræktast 3 bakteríur til viðbótar í blóðræktun hjá mér þannig að ég sé fram á viðbótar sýklagjöf í æð í u.þ.b. viku í viðbót. Þetta er nú að verða dálítill vítahringur en það þýðir svo sem ekkert að vera að velta sér upp úr þessu. Þetta verður bara að hafa sinn gang. Áætlunin með speglunina á morgun virðist ætla að standa, ég á að vera fastandi frá miðnætti og vonandi gengur þetta allt saman vel þ.e.a.s. að skola úr stálrörinu. Stuttu eftir að stofugangi lauk komu Bryndís og Hilmar? smitsjúkdómalæknar við hjá mér og fóru yfir allt þetta bakteríumál. Gerði nú lítið annað en rugla mig en ég bað þau um að koma þessum málum vel til skila til Ásgeirs Theódórs (sá sem sér um röramálin) og hans fólks. Þau voru sammála því og ætluðu að sjá til þess. Myrkáin rennur nú fram hjá mér með síauknum þunga eftir því sem spennan eykst, einungis 20 bls. eftir. Ég mun klára hana núna á eftir og þá tekur við Sólkross Óttars M. Norðfjörð. Guðfinna (mágkona) kom færandi hendi eftir hádegið. Hún færði mér mjólkurhristing sem er alltaf góður + flatkökupakka + 1 bréf af hangikjötsáleggi + eina öskju af smjörva. Nú er ég sem sagt orðinn sjálfbær með mat ef einhver leiðindi eru í boði. Ekki slæmt. Guffa sat hjá mér góða stund og spjallaði, hún var síðan á leiðinni . Guðlaug vinkona mín og vinnufélagi úr MK kom í heimsókn seinni partinn og bætti á sætindahliðina með Gullmolum frá Nóa (veit ekki hvernig maður endar ef svona heldur áfram;°) Það var gott að fá Gullu, kjafta svolítið og fá fréttir úr MK. Elli bróðir kom kl . 5 og spjallaði í klukkutíma, lætur þokkalega af verkefnum í AM en segir að bransinn kvíði janúar- og febrúarmánuðum. Maturinn kom á meðan Elli var hjá mér. Ekkert merkilegt, skinku / pastaréttur og rabbarbaragrautur með rjómablandi sem var reyndar fínn. Birna kom rétt fyrir klukkan sex, beint úr vinnunni og sat hjá mér í klukkutíma. Laufey Sif ætlaði að elda kjúklingabringur en Birna ætlaði svo að kíkja til Fjólu eftir matinn. Sigurjón bróðir kom við á leiðinni úr AM, var að vísu ekki beint að koma úr vinnunni heldur var hann að sprauta bíl fyrir Halla rafvirkja vin sinn. Fín aðstaða þar með sprautuklefa og allar græjur. Sigurjón stoppaði meðan dagvaktin var endurtekin og við horfðum á brot úr Stebba Hilmars, sveppaeitrunarþættinum ógleymanlega. Eftir að Sigurjón var farinn fór ég að slaka á, tölvast, lesa o.þ.h. "Fastandi"skiltið var hengt upp til að minna liðið á að éga má hvorki fá vott né þurrt frá miðnætti. Myrká liggur nú í valnum og eins og alltaf blandast tilfinningar þegar góð bók klárast. Gleði yfir að endirinn kemur í ljós, jafnvel þó hann hann sé stundum loðinn og óljós og svo vonbrigði vegna þess sem ósagt var og vegna þeirra viðbótarupplýsinga sem maður vildi svo gjarnan fá. Þessi bók stendur, að mínu mati, fullkomlega undir því að flokkast sem "góður" Arnaldur.

Nú hef ég rifið plastið utan af Sólkrossinum (ekki eftir neinu að bíða) merkt mér bókina og hefst nú lesturinn........

Klostredíum og fleira skemmtilegt

Skrítinn morgunn. Svaf ótrúlega mikið, þótt svefninn hafi verið gloppóttur þá var hann yfir það heila tekið 10 tímar (frá hálf 12 til hálf 10 í morgun). Ég hafði ekki einu sinni rumskað þegar morgunmaturinn var settur hjá mér sem yfirleitt um klukkan hálf 9 til 9. Mamma kom við hjá mér um klukkan 10, átti leið hjá. Sat hjá mér í góða stund sem var fínt. Eftir að hún var farin leyfði ég mér bara að vera latur, las smávegis, dútlaði í tölvunni og dormaði þess á milli. Ég uppgötvaði hvað var öðruvísi við rúmið, svefninn OG BAKIÐ frá fyrri nóttum. Þegar rúmið mið var fært milli herbergja þá höfðu vinkonur mínar viljað gera mér extra gott og settu eggjabakkadínu ofaná dínuna sem var fyrir. Ég er óvanur svona dínu og þess vegna var hún eitthvað að trufla mig. Ég ætla samt að láta reyna á þetta og sjá hvernig næsta nótt verður á eggjabökkunum:-) Ég las talsvert í Myrká Arnaldar, er líklega búinn með 2/3 af bókinni. Hún er fín, ekta Arnaldur, efnistökin ekkert rosalega umfangsmikil en listilega spunnið á milli til að teygja lopann. Svona geta bara meistarar. Atli vinur kom í heimsókn og færði mér konfektkassa, þær eiga eftir að fá að kroppa í hann hjúkkurnar sem snúast í kring um mig. Þá meina ég auðvitað kroppa í konfektkassann, ekki Atla;-) Birna kom svo þegar Atli var að tygja sig til heimferðar. Hún dreif mig á lappir, í fötin og út í göngutúr, engin miskunn þar. Nei, grínlaust þá var það auðvitað frábærlega hressandi og gaman að labba í götunum hérna við spítalann með þessum fallegu húsum og görðum og ekki skemma jólaskreytingarnar sem víða eru komnar upp. Þegar inn var komið var maturinn á borðinu og farinn að kólna, ekki að það breytti mjög miklu um gæðin held ég, frekar óspennandi að vanda. Eftir mat var lesið, horft á imbann, stússast í tölvunni, þessa dagana er það helst bloggið og Facebook sem slæst um tíma minn. Ég er að fást við dálítið skemmtilegt fikt á facebook sem heitir "where I´ve been" eða "hvar hef ég verið". Þá merki ég inn á heimskort staði, borgir og /eða lönd, sem ég hef komið til. Ansi skemmtilegt en merkilegt hvað maður hefur gleymt miklu af t.d. borgum sem maður hefur komið til. Alltaf að rifjast eitthvað nýtt upp og það er seinlegt að vera alltaf að fara inn aftur og aftur og bæta við.

Nú er klukkan að detta í tólf og nú ætla ég að fara að sofa.

Afmælisdagur

Byrjaði á að opna "fésbókina" mína og fékk áfall. Hugsaði bara: "hvað er ég búinn að koma mér í að byrja að setja efni inn á veraldarvefinn á þennan hátt". Stjórnendur síðunnar setja sjálfvirkt afmæliskveðju efst á síðuna þannig að kl. 9.30 var þegar komin löng runa af fólki búið að senda mér kveðjur á "Vegginn" sem ég þurfti að bregðast við (eða mér finnst það nú skemmtilegra).

Birna kom og sótti mig klukkan hálf tvö og það var gott að koma heim. Við komum að vísu við í Krónunni og versluðum svolítið fyrir afmæliskaffið. Þegar heim var komið var gaman að sjá hvað nýji flatskjárinn og mublurnar frá Hirzlunni fara vel uppi í sjónvarpsholinu. Smellpassar allt saman. Birna fór að stússast í kökufrágangi og ég fór að lesa helgarblöðin.
Birna var nú búin að gefa mér fyrirfram, frakkann góða, sem þegar hefur komið sér frábærlega vel. Bjarni Grétar og Beta gáfu mér Bókina Sólkross eftir Óttar M Norðfjörð. Það var vel valið því ég var mjög sáttur með bókina hans Óttars frá í fyrra "Hnífur Abrahams". Laufey Sif og Kalli gáfu mér nærbuxur og stuttermabol. Kamilla Sif Carlsdóttir gaf afa sínum nýja diskinn með KK sem er algjörlega frábær. Mamma og Binni gafu mér reglulega fallega hvíta ullarpeysu sem á eftir að koma sér vel í vetur. Peysunni fylgdi að sjálfsögðu fallegur englakertastjaki að hætti mömmu;) Elli bróðir gaf mér tvöfalda diskinn með Íslenska þursaflokknum og Cabút. Hlakka til að hlusta á þennan disk, veit að þetta var flott framtak sem fékk góða dóma. Siggi bró og Guffa mættu með Aldísi Öglu og Egil Orra. Þau færðu mér Grisham bók, man ekki alveg hvað hún heitir en hann er alltaf sígildur. Sigurjón bróðir færði mér bókina um Forseta Íslands. Ég er sem sagt orðinn ágætlega settur með lesefni enda fínt, aldrei of mikið af góðum bókum.

Þegar ég kom upp á spítala þá var búið að færa mig úr herbergi 10 yfir í einstaklingsherbergi nr 14. Það kom ekki til af góðu heldur vegna þess að það hafði fundist í mér Klostridium baktería sem þýðir að ég þarf að fara á enn eitt sýklalyfið og vera í sóttkví í nokkra daga.

Frumsamið lag í afmælisgjöf

Jæja þetta var annasamur dagur en frábær í alla staði. Ég vaknaði eldhress kl. 6 í morgun, hafði þá sofið í einum blundi frá kl. rúmlega 1. Mér var ómögulegt að sofna aftur fyrr en eftir morgun-matinn, dottaði þá aðeins. Ég var búinn að fá sýklalyfin mín, töflubirgðir fyrir eftirmiðdegið og þar með orðinn klár í slaginn þegar Birna kom með sparifötin klukkan hálf ellefu. Við komum í kirkjuna rétt fyrir ellefu, u.þ.b. þegar kórinn var að stilla sér á pallana. Messan var hátíðleg, athygli vakti góð kirkjusókn. Karlakórinn sá um messusvörin ásamt söfnuðinum og söng sálmana úr messuskránni. Að auki söng kórinn í tveimur hlutum nokkur falleg jólalög sem hljómuðu voldugt og fallega í þessari stórfenglegu kirkju sem kennd er við Hallgrím Pétursson. Að messu lokinni fór talsverður tími í að heilsa félögunum og spjalla. Siðan ákváðum við að aka með fram Öskjuhlíðinni þar sem Vaskur fékk að hlaupa um í smá stund. Hann hafði verið mjög glaður að sjá mig og var ekki minna glaður þegar hann hitti Tobba, hundinn hans Tinna (sama tegund og er í Tinnabókunum:-) Eftir að Vaskur hafði hlaupið nægju sína og skilað frá sér tilheyrandi, röltum við Birna inn á Hótel Loftleiðir. Af tillitssemi við aðra gesti skildum við samt Vask eftir í bílnum.

Þetta er orðinn nokkurra ára siður hjá Gammel Dansk klúbbnum að hittast á þessum stað á þessum sama sunnudegi (þegar kórinn syngur aðventumessuna). Það er líklega óþarfi að taka það fram en það var að frumkvæði Marentzu Paulsen að hittast þennan dag í "ekte dansk julefråkost". Marentza sér alltaf um að útskýra fyrir okkur alla réttina enda algjör sérfræðingur þar á ferð. Það er auðvitað þannig að ekki er alltaf full mæting. Það getur alltaf eitthvað komið upp á hjá fólki og ekkert við því að gera. Í þetta sinn voru 3 fjarverandi, 2 vegna veikinda og einn í námsferð erlendis.

Að venju eyddum við fyrsta klukkutímanum í síldarréttunum sem eru sérgrein Marentzu. Svo eru það hinir forréttirnir, lax, paté o.fl. namminamm.

Valdi gaf undirrituðum, í tilefni afmælisins á morgun, frumsamið lag sem hann hefur látið Pétur Hjaltested setja á CD og tileinkað mér. Að auki fylgdi annar CD með laginu "kannsk´er ástin" sem þeir feðgar, Valdi og Tryggvi Valdimarsson syngja eins og englar. Þessi vinarhugur frá Valda og Þuru snerti mig djúpt enda lagið frumsamda mjög fallegt (það var auðvitað sett í B&O um leið og heim var komið) og sýnir vel, sem ég vissi nú fyrir, hversu lunkinn tónlistarmaður Valdi er. Hann spilaði sjálfur lagið inn á diskinn en líklega hefur Pétur séð um Hljómborð sem studdi við á köflum.
Við sátum lengi við matarborðið á Loftleiðum eins og venja er á danskan máta. Að vísu hafði Marentza fengið brottfaraleyfi þar sem hún stendur í stórræðum í Árbæjarsafni með kaffihúsarekstur eða eins og hún kallar framtakið "gömlu litlu jólin". Hún átti von á u.þ.b. 1000 manns í dag í kakó og vöfflur:) Klukkan var rúmlega 3 þegar við hin héldum södd og sæl frá Loftleiðum. Mig langaði til að kíkja aðeins við heima í Berjarimanum áður en ég færi á spítalann svo við Birna ásamt Vaski brunuðum í Grafarvoginn. Það var gott að koma heim og smella kossi á liðið. Eins og áður segir var hlustað á Geisladiskana frá Valda og Þuru og dáðst að. Eftir smá slökun og fataskipti skutlaði Birna mér á spítalann. Klukkutíma seinna var borinn fram matur sem leit reyndar vel út (kjúklingur) en ég hefði ekki getað komið niður einum bita svo ég afþakkaði.

Siggi bróðir kom í heimsókn um klukkan átta. Hann kom með lúpínuseyði handa mér en það var búið. Hann kom líka með ávexti og mjólkurhristing. Svo kom hann með piparkökukerlingar sem Aldís Agla hafði skreytt alveg rosalega fallega. það var gott að fá Sigga og við spjölluðum mikið. Ég var farinn að hafa áhyggjur af að við værum að trufla Steindór herbergisfélaga minn en ég held að það hafi nú ekki verið svo. Siggi fór um kl. 10 og um svipað leiti fékk ég lyfin mín.

"Bragðið gott fyrst en svo hrakar því"

Vaknaði þegar morgunmaturinn "kallaði á mig" kl. hálf níu. Þá hafði ég náð nokkrum blundum eftir erfiða nótt. Svaf lítið og stopult framan af bæði vegna niðurgangs og stöðugra verkja. Ég lét hjúkrunarliðið hafa hægðarprufu, þeim til lítillar gleði, mjög mikil gulueinkenni. Fékk aukamorfínskammt og aukasvefntöflu um hálf þrjúleitið. Auk þess hitastillandi töflur því hitinn var kominn upp undir 39°C. Svaf betur eftir þá innspýtingu en vaknaði þó nokkrum sinnum aðallega vegna niðurgangs sem var að kvelja mig fram undir morgun. Ég hafði greinilega samt náð að steinsofna í 3-4 klst. fram að morgunmatnum. Þá var mér farið að líða miklu betur og hafði góða list á hafragrautnum öðru meðlæti. Eftir morgunmatinn las ég hið frábæra "menningarrit" Séð og heyrt og hélt svo áfram að reyna að ná einbeitingu við að hlusta á hljóðbók sem ég hafði fengið lánaða hjá Kvennadeild RRKÍ sem er hópur elskulegra kvenna sem lánar út bækur og hljóðbækur á spítalanum. Allt í sjálfboðavinnu til styrktar spítalanum. Það hafði nú verið frekar fátæklegt úrval á vagninum sem ég skoðaði en ég ákvað að taka hljóðbók á 5 snældum (við erum að tala um gömlu góðu kassetturnar) sem heitir Kristinn í Björgun-Eldhuginn í sandinum, skrifuð af Árna Johnsen. Ég kláraði að hlusta á tvær snældur en ég er ákveðinn í að fórna eldhuganum fyrir Myrká eftir Arnald. Ég ætla ekkert að velta mér upp úr því hvort það er framsetningarformið, sagan, skáldið eða ritstíllinn sem veldur því að enn sem komið er held ég að mér henti frekar að lesa á gamla mátann heldur en að hlusta á snældur eða diska. Eftir hádegið kom Birna með fartölvuna svo nú er ég þegar farinn að blogga á fullu eða eins og ég hef nennu til. Hún kom líka með rakdótið svo ég skellti mér í sturtu og rakstur og var nú orðinn eins og nýr maður.

Friðbjörn læknir birtist óvænt (varla að við þekktum hann svona í borgaralegum klæðum;) Hann var nú bara svona að kíkja á uppáhalds sjúklinginn sinn hehe, spurði hvernig við hefðum það og ákvað að best væri að ég hætti að taka Xelota krabbameinslyfið. Þá er bara að byrja að byggja upp orku aftur á fullu.

Fjóla og Magni komu í heimsókn og færðu mér konfektbox í afmælisgjöf (fyrirfram) og gáfu okkur Birnu svo skýrslu fyrir gærkvöldið. Þau létu vel af jólahlaðborðinu en fyndið var að suma-klúbbshópurinn lenti svo eftir allt saman við hliðina á Klúbbi bakarameistara en við Birna höfðum verið í vandræðum með að velja með hvorum hópnum við ættum að sitja. Magni bar kveðju frá okkur til bakarahópsins og eftirfarandi vísu í leiðinni:

Ég baka oft köku sem brakar í,

bragðið gott fyrst en svo hrakar því.

Og eftir tvo bita,

er gott að vita,

að stutt er í næsta bakarí.

Þetta vakti auðvitað mikla lukku hjá bakarahópnum og fengum við sms-kveðjur til baka. Eins og búast mátti við voru þessir tveir vinahópar okkar síðasta fólkið úr salnum á Grand Hótel.

Þær mæðgur Laufey Sif og Kamilla Sif kíktu svo til okkar beint úr piparkökubakstrinum hjá tengdó. Það fór ekki milli mála að Kamilla Sif hafði tekið fullan þátt í skreytingunum og smökkuninni. Það sást á fötunum hennar. En mikið var gaman að fá þær í heimsókn:-)

Vondur matur og annar

Svaf bara þokkalega í nótt enda þreyttur eftir myndatökubröltið í gærkvöldi. Hádegismaturinn var skelfilegur, dularfullir fiskbitar faldir í torkennilegu ostagumsi. Birna kom með mjólkurhrist-ing, flatkökur og hangikjöt seinni partinn svo ég fengi eitthvað að borða. Tengdó kom í heimsókn og skildi eftir lesefni handa mér sem ekki er af verri endanum, eða Myrká eftir Arnald Indriðason. Ég hlakka til að byrja á henni enda mikill aðdáandi Arnaldar. Í kvöldmatinn var boðið upp á ágætis kjötbollur, með kartöflumús, rauðkáli, sósu og sultu. Svona ekta mömmumatur sem mætti alveg vera oftar á boðstólum. Siggi og Guffa komu í heimsókn og sátu góða stund og spjölluðu. Þau voru síðan að fara í heimsókn til Ómars og Elfu. Dormaði yfir sjónvarpinu talsvert fram eftir kvöldinu. Fór að finna fyrir vanlíðan um miðnættið.

Og þá var draumurinn búinn....!

Vaknaði með vanlíðan og hitavellu.
Hringdum í Heimahlynninguna og Guðbjörg kom um kl. 11. Okkur kom saman um að best væri að fara strax á bráðamóttökuna svo Birna afboðaði sig í vinnu og við hentum helstu nauðsynjum í poka og brunuðum niður eftir. Þar hófst hefðbundin innskráning og síðan var ég keyrður í röntgenmynd af lungum. Ég þurfti sem betur fer ekki að liggja lengi á bráðamóttökunni því ég var komst fljótt upp á 11-E. Teknar voru blóðprufur og ýmis viðtöl, s.s. lyfjaskráningar o.fl. Mamma kom með mjólkurhristing og súkkulaði sem rann ljúflega niður. Hún sat hjá okkur góða stund.

Um kvöldið kom allt í einu hjúkrunarkona með 1 líter af skuggaefni sem ég átti að drekka milli kl. 20 og 21:30 vegna þess að ég ætti að fara í sneiðmyndatöku kl 22:00. Það hafði komið beiðni frá Friðbirni því hann vildi vita hvort myndataka myndi sýna stíflu í rörinu góða. Það hljómaði ágætlega og ég var svo sem ánægður með að þeir væru ekkert að drolla með þetta. Var nú samt orðinn bísna þreyttur þegar þessu öllu var lokið. Fór að ekki að sofa fyrr en eftir miðnætti.

Tækniframfarir og álög

Í dag var farið í leiðangur til að kaupa sjónvarpsborð undir nýja plasmatækið á heimilinu. Við fundum ágætis borð í Hirzlunni í Garðabæ. Við skelltum okkur á gripinn og heim var haldið og Bjarna Grétari fengið það verkefni í hendur að setja undrið saman. Það gekk nú ágætlega en tók sinn tíma eins og gjarnan er um svona siningadót. Það var ekki fyrr en Birna kom heim heim og sá gripinn að hún hvað upp úr með þau gleðitíðindi að þetta væri alls ekki rétti skápurinn #%&$/#%$. Það á ekki af þessu sjónvarpsævintýri að ganga, fyrst fengum við afhent vitlaust sjónvarpstæki og síðan vitlaust borð undir tækið. Hvað verður það næst. Og við sem afþökkuðum tryggingu á skjáinn........!! Carl tendasonur er viss um að það séu álög á tækinu og það eigi eftir að detta í gólfið og brotna. Auðvitað erum við síðan búnir að standa í hefðbundnum erfiðleikum með að tengja saman sjónvarp, DVD spilara, videótæki o.s.frv. Eins gott að við erum ekki með heimabíó að auki eins og mér skilst að "allir" séu með. Á morgun verður farið í Hirzluna, borðinu skipt (það er eins gott sð það rétta verði til í búðinni) svo hægt verði að ljúka þessum kafla í tæknivæðingu fjölskyldunnar.

Aðventusöngur

Fórum á útgáfutónleika í Áskirkju. Þar var kór Áskirkju að kynna nýjan jóladisk sem ber nafnið Það aldin út er sprungið. Stjórnandi kórsins og organisti kirkjunnar er Magnús Ragnarsson. Á heimasíðu kirkjunnar kemur fram að Kári Þormar sem verið hefur organisti og stjórnandi frá árinu 2001 hafi tekið sér ársleyfi frá störfum hinn 1. september 2007. Kórinn er fremur fámennur, 18 manns sem skiptist jafnt eftir kynjum. Þetta voru hinir fínustu tónleikar, kórinn mjög góður og hefur yfir að ráða mörgum mjög hæfileikaríkum söngvurum hverjir sýndu nokkrir listir sínar í einsöng og tvísöng.

Fullveldi og brúðkaup

Í dag er brúðkaupsdagurinn okkar, sá 24. ef við erum að telja rétt


Birna mín kom heim með Sushibakka frá Osushi sem er í Iðuhúsinu.. Opnuð var hvítvínsflaska og allt var eins og best gæti verið á kosið nema ég sjálfur var handónýtur og lítið gaman að sitja með mér yfir fínum mat.