Frumsamið lag í afmælisgjöf

Jæja þetta var annasamur dagur en frábær í alla staði. Ég vaknaði eldhress kl. 6 í morgun, hafði þá sofið í einum blundi frá kl. rúmlega 1. Mér var ómögulegt að sofna aftur fyrr en eftir morgun-matinn, dottaði þá aðeins. Ég var búinn að fá sýklalyfin mín, töflubirgðir fyrir eftirmiðdegið og þar með orðinn klár í slaginn þegar Birna kom með sparifötin klukkan hálf ellefu. Við komum í kirkjuna rétt fyrir ellefu, u.þ.b. þegar kórinn var að stilla sér á pallana. Messan var hátíðleg, athygli vakti góð kirkjusókn. Karlakórinn sá um messusvörin ásamt söfnuðinum og söng sálmana úr messuskránni. Að auki söng kórinn í tveimur hlutum nokkur falleg jólalög sem hljómuðu voldugt og fallega í þessari stórfenglegu kirkju sem kennd er við Hallgrím Pétursson. Að messu lokinni fór talsverður tími í að heilsa félögunum og spjalla. Siðan ákváðum við að aka með fram Öskjuhlíðinni þar sem Vaskur fékk að hlaupa um í smá stund. Hann hafði verið mjög glaður að sjá mig og var ekki minna glaður þegar hann hitti Tobba, hundinn hans Tinna (sama tegund og er í Tinnabókunum:-) Eftir að Vaskur hafði hlaupið nægju sína og skilað frá sér tilheyrandi, röltum við Birna inn á Hótel Loftleiðir. Af tillitssemi við aðra gesti skildum við samt Vask eftir í bílnum.

Þetta er orðinn nokkurra ára siður hjá Gammel Dansk klúbbnum að hittast á þessum stað á þessum sama sunnudegi (þegar kórinn syngur aðventumessuna). Það er líklega óþarfi að taka það fram en það var að frumkvæði Marentzu Paulsen að hittast þennan dag í "ekte dansk julefråkost". Marentza sér alltaf um að útskýra fyrir okkur alla réttina enda algjör sérfræðingur þar á ferð. Það er auðvitað þannig að ekki er alltaf full mæting. Það getur alltaf eitthvað komið upp á hjá fólki og ekkert við því að gera. Í þetta sinn voru 3 fjarverandi, 2 vegna veikinda og einn í námsferð erlendis.

Að venju eyddum við fyrsta klukkutímanum í síldarréttunum sem eru sérgrein Marentzu. Svo eru það hinir forréttirnir, lax, paté o.fl. namminamm.

Valdi gaf undirrituðum, í tilefni afmælisins á morgun, frumsamið lag sem hann hefur látið Pétur Hjaltested setja á CD og tileinkað mér. Að auki fylgdi annar CD með laginu "kannsk´er ástin" sem þeir feðgar, Valdi og Tryggvi Valdimarsson syngja eins og englar. Þessi vinarhugur frá Valda og Þuru snerti mig djúpt enda lagið frumsamda mjög fallegt (það var auðvitað sett í B&O um leið og heim var komið) og sýnir vel, sem ég vissi nú fyrir, hversu lunkinn tónlistarmaður Valdi er. Hann spilaði sjálfur lagið inn á diskinn en líklega hefur Pétur séð um Hljómborð sem studdi við á köflum.
Við sátum lengi við matarborðið á Loftleiðum eins og venja er á danskan máta. Að vísu hafði Marentza fengið brottfaraleyfi þar sem hún stendur í stórræðum í Árbæjarsafni með kaffihúsarekstur eða eins og hún kallar framtakið "gömlu litlu jólin". Hún átti von á u.þ.b. 1000 manns í dag í kakó og vöfflur:) Klukkan var rúmlega 3 þegar við hin héldum södd og sæl frá Loftleiðum. Mig langaði til að kíkja aðeins við heima í Berjarimanum áður en ég færi á spítalann svo við Birna ásamt Vaski brunuðum í Grafarvoginn. Það var gott að koma heim og smella kossi á liðið. Eins og áður segir var hlustað á Geisladiskana frá Valda og Þuru og dáðst að. Eftir smá slökun og fataskipti skutlaði Birna mér á spítalann. Klukkutíma seinna var borinn fram matur sem leit reyndar vel út (kjúklingur) en ég hefði ekki getað komið niður einum bita svo ég afþakkaði.

Siggi bróðir kom í heimsókn um klukkan átta. Hann kom með lúpínuseyði handa mér en það var búið. Hann kom líka með ávexti og mjólkurhristing. Svo kom hann með piparkökukerlingar sem Aldís Agla hafði skreytt alveg rosalega fallega. það var gott að fá Sigga og við spjölluðum mikið. Ég var farinn að hafa áhyggjur af að við værum að trufla Steindór herbergisfélaga minn en ég held að það hafi nú ekki verið svo. Siggi fór um kl. 10 og um svipað leiti fékk ég lyfin mín.

"Bragðið gott fyrst en svo hrakar því"

Vaknaði þegar morgunmaturinn "kallaði á mig" kl. hálf níu. Þá hafði ég náð nokkrum blundum eftir erfiða nótt. Svaf lítið og stopult framan af bæði vegna niðurgangs og stöðugra verkja. Ég lét hjúkrunarliðið hafa hægðarprufu, þeim til lítillar gleði, mjög mikil gulueinkenni. Fékk aukamorfínskammt og aukasvefntöflu um hálf þrjúleitið. Auk þess hitastillandi töflur því hitinn var kominn upp undir 39°C. Svaf betur eftir þá innspýtingu en vaknaði þó nokkrum sinnum aðallega vegna niðurgangs sem var að kvelja mig fram undir morgun. Ég hafði greinilega samt náð að steinsofna í 3-4 klst. fram að morgunmatnum. Þá var mér farið að líða miklu betur og hafði góða list á hafragrautnum öðru meðlæti. Eftir morgunmatinn las ég hið frábæra "menningarrit" Séð og heyrt og hélt svo áfram að reyna að ná einbeitingu við að hlusta á hljóðbók sem ég hafði fengið lánaða hjá Kvennadeild RRKÍ sem er hópur elskulegra kvenna sem lánar út bækur og hljóðbækur á spítalanum. Allt í sjálfboðavinnu til styrktar spítalanum. Það hafði nú verið frekar fátæklegt úrval á vagninum sem ég skoðaði en ég ákvað að taka hljóðbók á 5 snældum (við erum að tala um gömlu góðu kassetturnar) sem heitir Kristinn í Björgun-Eldhuginn í sandinum, skrifuð af Árna Johnsen. Ég kláraði að hlusta á tvær snældur en ég er ákveðinn í að fórna eldhuganum fyrir Myrká eftir Arnald. Ég ætla ekkert að velta mér upp úr því hvort það er framsetningarformið, sagan, skáldið eða ritstíllinn sem veldur því að enn sem komið er held ég að mér henti frekar að lesa á gamla mátann heldur en að hlusta á snældur eða diska. Eftir hádegið kom Birna með fartölvuna svo nú er ég þegar farinn að blogga á fullu eða eins og ég hef nennu til. Hún kom líka með rakdótið svo ég skellti mér í sturtu og rakstur og var nú orðinn eins og nýr maður.

Friðbjörn læknir birtist óvænt (varla að við þekktum hann svona í borgaralegum klæðum;) Hann var nú bara svona að kíkja á uppáhalds sjúklinginn sinn hehe, spurði hvernig við hefðum það og ákvað að best væri að ég hætti að taka Xelota krabbameinslyfið. Þá er bara að byrja að byggja upp orku aftur á fullu.

Fjóla og Magni komu í heimsókn og færðu mér konfektbox í afmælisgjöf (fyrirfram) og gáfu okkur Birnu svo skýrslu fyrir gærkvöldið. Þau létu vel af jólahlaðborðinu en fyndið var að suma-klúbbshópurinn lenti svo eftir allt saman við hliðina á Klúbbi bakarameistara en við Birna höfðum verið í vandræðum með að velja með hvorum hópnum við ættum að sitja. Magni bar kveðju frá okkur til bakarahópsins og eftirfarandi vísu í leiðinni:

Ég baka oft köku sem brakar í,

bragðið gott fyrst en svo hrakar því.

Og eftir tvo bita,

er gott að vita,

að stutt er í næsta bakarí.

Þetta vakti auðvitað mikla lukku hjá bakarahópnum og fengum við sms-kveðjur til baka. Eins og búast mátti við voru þessir tveir vinahópar okkar síðasta fólkið úr salnum á Grand Hótel.

Þær mæðgur Laufey Sif og Kamilla Sif kíktu svo til okkar beint úr piparkökubakstrinum hjá tengdó. Það fór ekki milli mála að Kamilla Sif hafði tekið fullan þátt í skreytingunum og smökkuninni. Það sást á fötunum hennar. En mikið var gaman að fá þær í heimsókn:-)

Vondur matur og annar

Svaf bara þokkalega í nótt enda þreyttur eftir myndatökubröltið í gærkvöldi. Hádegismaturinn var skelfilegur, dularfullir fiskbitar faldir í torkennilegu ostagumsi. Birna kom með mjólkurhrist-ing, flatkökur og hangikjöt seinni partinn svo ég fengi eitthvað að borða. Tengdó kom í heimsókn og skildi eftir lesefni handa mér sem ekki er af verri endanum, eða Myrká eftir Arnald Indriðason. Ég hlakka til að byrja á henni enda mikill aðdáandi Arnaldar. Í kvöldmatinn var boðið upp á ágætis kjötbollur, með kartöflumús, rauðkáli, sósu og sultu. Svona ekta mömmumatur sem mætti alveg vera oftar á boðstólum. Siggi og Guffa komu í heimsókn og sátu góða stund og spjölluðu. Þau voru síðan að fara í heimsókn til Ómars og Elfu. Dormaði yfir sjónvarpinu talsvert fram eftir kvöldinu. Fór að finna fyrir vanlíðan um miðnættið.

Og þá var draumurinn búinn....!

Vaknaði með vanlíðan og hitavellu.
Hringdum í Heimahlynninguna og Guðbjörg kom um kl. 11. Okkur kom saman um að best væri að fara strax á bráðamóttökuna svo Birna afboðaði sig í vinnu og við hentum helstu nauðsynjum í poka og brunuðum niður eftir. Þar hófst hefðbundin innskráning og síðan var ég keyrður í röntgenmynd af lungum. Ég þurfti sem betur fer ekki að liggja lengi á bráðamóttökunni því ég var komst fljótt upp á 11-E. Teknar voru blóðprufur og ýmis viðtöl, s.s. lyfjaskráningar o.fl. Mamma kom með mjólkurhristing og súkkulaði sem rann ljúflega niður. Hún sat hjá okkur góða stund.

Um kvöldið kom allt í einu hjúkrunarkona með 1 líter af skuggaefni sem ég átti að drekka milli kl. 20 og 21:30 vegna þess að ég ætti að fara í sneiðmyndatöku kl 22:00. Það hafði komið beiðni frá Friðbirni því hann vildi vita hvort myndataka myndi sýna stíflu í rörinu góða. Það hljómaði ágætlega og ég var svo sem ánægður með að þeir væru ekkert að drolla með þetta. Var nú samt orðinn bísna þreyttur þegar þessu öllu var lokið. Fór að ekki að sofa fyrr en eftir miðnætti.

Tækniframfarir og álög

Í dag var farið í leiðangur til að kaupa sjónvarpsborð undir nýja plasmatækið á heimilinu. Við fundum ágætis borð í Hirzlunni í Garðabæ. Við skelltum okkur á gripinn og heim var haldið og Bjarna Grétari fengið það verkefni í hendur að setja undrið saman. Það gekk nú ágætlega en tók sinn tíma eins og gjarnan er um svona siningadót. Það var ekki fyrr en Birna kom heim heim og sá gripinn að hún hvað upp úr með þau gleðitíðindi að þetta væri alls ekki rétti skápurinn #%&$/#%$. Það á ekki af þessu sjónvarpsævintýri að ganga, fyrst fengum við afhent vitlaust sjónvarpstæki og síðan vitlaust borð undir tækið. Hvað verður það næst. Og við sem afþökkuðum tryggingu á skjáinn........!! Carl tendasonur er viss um að það séu álög á tækinu og það eigi eftir að detta í gólfið og brotna. Auðvitað erum við síðan búnir að standa í hefðbundnum erfiðleikum með að tengja saman sjónvarp, DVD spilara, videótæki o.s.frv. Eins gott að við erum ekki með heimabíó að auki eins og mér skilst að "allir" séu með. Á morgun verður farið í Hirzluna, borðinu skipt (það er eins gott sð það rétta verði til í búðinni) svo hægt verði að ljúka þessum kafla í tæknivæðingu fjölskyldunnar.

Aðventusöngur

Fórum á útgáfutónleika í Áskirkju. Þar var kór Áskirkju að kynna nýjan jóladisk sem ber nafnið Það aldin út er sprungið. Stjórnandi kórsins og organisti kirkjunnar er Magnús Ragnarsson. Á heimasíðu kirkjunnar kemur fram að Kári Þormar sem verið hefur organisti og stjórnandi frá árinu 2001 hafi tekið sér ársleyfi frá störfum hinn 1. september 2007. Kórinn er fremur fámennur, 18 manns sem skiptist jafnt eftir kynjum. Þetta voru hinir fínustu tónleikar, kórinn mjög góður og hefur yfir að ráða mörgum mjög hæfileikaríkum söngvurum hverjir sýndu nokkrir listir sínar í einsöng og tvísöng.

Fullveldi og brúðkaup

Í dag er brúðkaupsdagurinn okkar, sá 24. ef við erum að telja rétt


Birna mín kom heim með Sushibakka frá Osushi sem er í Iðuhúsinu.. Opnuð var hvítvínsflaska og allt var eins og best gæti verið á kosið nema ég sjálfur var handónýtur og lítið gaman að sitja með mér yfir fínum mat.